Ísland á langbestu stuðningsmennina á EM
Það virðist vera samdóma álit allra þeirra sem fylgjast með EM kvennalandsliða í Finnlandi að íslensku stuðningsmennirnir séu þeir langbestu í keppninni. Íslendingar hafa fjölmennt á leiki íslenska liðsins í Tampere og Lahti og haldið uppi frábærri stemmningu í stúkunni svo eftir er tekið.
Stelpurnar finna svo sannarlega fyrir þessum góða stuðningi og tala iðulega um að þetta sé eins og leika á heimavelli. Fulltrúar finnsku skipulagsnefndarinnar og UEFA hafa á orði að þessi stemmning sé einstök og stórmerkilegt að fámennasta landið í keppninni skuli eiga svona stóran hóp öflugra stuðningsmanna, fólk á öllum aldri, allir bláklæddir, syngjandi og trallandi íslenska hvatningar- og ættjarðarsöngva.
Nú er aðeins einn leikur eftir í keppninni hjá islenska liðinu, gegn Þýskalandi á sunnudag. Eitt er ljóst: Það verður stuð í stúkunni.
Áfram Ísland, alltaf, alls staðar!
