Svíar efstir í C-riðli eftir öruggan sigur
Svíar byrjuðu EM með sannfærandi 3-0 sigri á Rússum í 1. umferð riðilsins. Rússar sáu aldrei til sólar í leiknum og ljóst er að sænska liðið er gríðarsterkt. Svíar töpuðu fyrir Norðmönnum í æfingaleik skömmu fyrir mót, og ef eitthvað er að marka þessi úrslit, þá virðast þeir hafa unnið vel í þeim atriðum sem þurfti að laga fyrir mótið.
Englendingar töpuðu nokkuð óvænt fyrir Ítölum 1-2. Enska liðið missti mann af velli í fyrri hálfleik, rautt spjald, en tókst samt að komast yfir í leiknum með marki úr vítaspyrnu. Ítalir svöruðu með tveimur mörkum og sigurmarkið kom seint í leiknum, þrumufleygur af löngu færi, óverjandi fyrir markvörð Englendinga.
