Þriðja viðureign Íslands og Serbíu á þremur árum
Kvennalandslið Íslands og Serbíu mætast í undankeppni HM 2011 á Laugardalsvelli á laugardag kl. 14:00. Þetta er fyrsti leikur beggja liða í undankeppninni, en þriðja viðureignin á þremur árum.
Ísland og Serbía voru saman í riðli í undankeppni EM 2009, þar sem Ísland hafnaði í 2. sæti riðilsins með 18 stig og komst í lokakeppni EM eftir umspil við Írland, eins og kunnugt er. Stelpurnar okkar unnu báða leikina gegn Serbum í riðlinum nokkuð sannfærandi, 5-0 á Laugardalsvellinum í júní 2007 og 4-0 ytra í maí 2008 og eru þetta einu viðureignir þjóðanna hingað til. Serbía hafnaði í 4. sæti riðilsins með 6 stig, á undan Grikkjum sem vermdu botnsætið með 3 stig.
Miðasala á leikinn er nú í fullum gangi á midi.is. Miðaverð fyrir 17 ára og eldri er kr. 1.000, en frítt er inn fyrir 16 ára og yngri og frjálst sætaval. Fólk er hvatt til að fjölmenna á völlinn og kveðja stelpurnar, því þetta er síðasti leikur liðsins áður en haldið er til Finnlands til að taka þátt í úrslitakeppni EM. Skoðið allt um úrsltiakeppnina á emstelpurnar.is.
.jpg?proc=760)
.jpg?proc=760)
