EM hópurinn tilkynntur á morgun
Á morgun kl. 12:45 mun Sigurður Ragnar Eyjólfsson tilkynna á blaðamannafundi þá 22 leikmenn sem leika munu í úrslitakeppni EM í Finnlandi. Þessi hópur mun einnig taka þátt í fyrsta leik liðsins í undankeppni HM 2011 gegn Serbíu á Laugardalsvelli, laugardaginn 15. ágúst.
Blaðamannafundurinn verður haldinn í kjölfarið á því að dregið verður í undanúrslitum VISA bikars karla en sú athöfn hefst kl. 12:00. Það verður því mikið um að vera í höfuðstöðvum KSÍ á morgun og mikilla frétta að vænta.
Úrslitakeppnin í Finnlandi hefst 23. ágúst en íslenska liðið mætir Frökkum í sínum fyrsta leik, mánudaginn 24. ágúst, í Tampere. Liðið mætir hinsvegar Serbum í undankeppni HM 2011 á Laugardalsvelli, laugardaginn 15. ágúst kl. 14:00. Þá er síðasti möguleikinn fyrir landsmenn að berja stúlkurnar augum í leik áður en þær halda til Finnlands. Miðasala á þann leik hefst á morgun og eru landsmenn hvattir til þess að mæta, styðja stelpurnar í mikilvægum leik og senda þær með góðar kveðjur til Finnlands.
