Aftur sigrar hjá U17 og U19 kvenna
Í gær fóru fram tveir vináttulandsleikir við Færeyjar og var leikið í aldursflokkum U17 og U19 kvenna. Sigrar unnust á báðum vígstöðvum, U17 vann með sex mörkum gegn einu og U19 vann með þremur mörkum gegn einu.
Leikur Íslands og Færeyja í U17 kvenna fór fram á Hvolsvelli við fínar aðstæður og vel var mætt á völlinn. Meðal annars kom rúta frá Álftanesi en leikmaður frá Álftanesi var þarna í fyrsta skiptið í íslensku landsliði. Íslensku stelpurnar lögðu grunninn af sigrinum í fyrri hálfleik með fjórum mörkum. Þær bættu svo tveimur mörkum við í síðari hálfleiknum en færeysku stelpurnar áttu síðasta orðið í leiknum og fögnuðu því marki vel. Aldís Lúðvíksdóttir var svo sannarlega á skotskónum í leiknum og skoraði fjögur mörk.
Í Þorlákshöfn léku U19 kvennalandslið Íslands og Færeyja og var sömu sögu að segja þaðan, aðstæður frábærar í góðu veðri. Færeyska liðið komst yfir í leiknum en íslenska liðið jafnaði og gengu liðin til búningsherbergja í stöðunni, 1 - 1. Íslenska liðið reyndist svo sterkara í síðari hálfleiknum og bætti við tveimur mörkum.
Færeyski hópurinn heldur heim á leið í dag en hann hefur dvalið hér síðan á föstudag. Stefnt er á áframhaldandi samstarfi á milli knattspyrnusambanda Íslands og Færeyja varðandi yngri kvennalandslið þjóðanna.
.jpg?proc=760)
.jpg?proc=760)
