Ísland - Danmörk hefst kl. 13:30 - Textalýsing
Í dag mætast Ísland og Danmörk í vináttulandsleik og verður leikið í Englandi. Leikurinn hefst kl. 13:30 en ekki kl. 13:00 eins og áætlað hafði verið í fyrstu en íslenska liðið tafðist í mikilli umferð á leiðinni á leikstað. Fylgst verður með leiknum hér á síðunni með textalýsingu.
Sigurður Ragnar Eyjólfsson hefur tilkynnt byrjunarlið sitt fyrir leikinn.
Byrjunarliðið (4-5-1):
Markvörður: Guðbjörg Gunnarsdóttir
Hægri bakvörður: Erna B. Sigurðardóttir
Vinstri bakvörður: Ólína G. Viðarsdóttir
Miðverðir: Katrín Jónsdóttir, fyrirliði og Guðrún Sóley Gunnarsdóttir
Tengiliðir: Edda Garðarsdóttir, Dóra Stefánsdóttir og Sara Björk Gunnarsdóttir
Hægri kantur: Dóra María Lárusdóttir
Vinstri kantur: Hólmfríður Magnúsdóttir
Framherji: Margrét Lára Viðarsdóttir
Ísland - Danmörk - Textalýsing
Það var greinilegt að leikmenn voru orðnir órþreyjufullir að byrja leikinn. Eftir fjórar mínútur er staðan orðin 1 - 1!! Danir komust yfir strax á 3. mínútu en Hólmfríður Magnúsdóttir jafnaði leikinn mínútu síðar með skoti úr teignum.
Ísland - Danmörk 1-2
Á 12. mínútu komast Danir yfir eftir góða sókn þeirra upp allan völlinn.
Leikurinn er jafn en íslenska liðið þó ívíð hættulegra. Edda Garðarsdóttir átti hörkuskot úr aukaspyrnu er hafnaði í stönginni á 20. mínútu og þremur mínútum síðar átti Margrét Lára skot sem fór naumlega framhjá.
Á 36. mínútu þurfti Ólína G. Viðarsdóttir að yfirgefa völlinn vegna meiðsla og í hennar stað kom Ásta Árnadóttir.
Lítið var af færum í síðari hluta hálfleiksins og íslenska liðið því undir þegar gengið var til búningsherbergja.
Sama lið hóf síðari hálfleikinn og byrjaði leikinn en á 53. mínútu kom Katrín Ómarsdóttir inná í stað Dóru Stefánsdóttur.
Á 57. mínútu átti Hólmfríður Magnúsdóttir svo hörkuskot sem markvörður Dana varði í þverslánna. Hólmfríður hefur ógnað marki Dana nokkrum sinnum í leiknum og er til alls líkleg að bæta við öðru marki sínu í leiknum.
Íslenska liðið er töluvert líklegra þessa stundina en hefur ekki náð að finna leiðina í netmöskvana hingað til.
Leiknum er lokið með sigri Dana með tveimur mörkum gegn einu. Íslenska liðið sótti gríðarlega mikið á lokakaflanum en inn vildi boltinn ekki.
