Knattþrautir hjá Frömurum í Grafarholtinu
Knattþrautir KSÍ verða kynntar fyrir krökkum í 5. flokki karla og kvenna hjá Fram í Grafarholtinu í Reykjavík í dag, miðvikudag, kl. 13:00. Gunnar Einarsson, sem hefur yfirumsjón með knattþrautunum, heimsækir félögin og fer yfir knattþrautirnar með iðkendum og þjálfurum.
Á mánudag var hann á Patreksfirði og þangað komu einnig krakkar frá Tálknafirði. Alls mættu 28 krakkar.
Á þriðjudag var Gunnar svo á Ísafirði og í Bolungarvík. 38 krakkar tóku þátt á Ísafirði og 11 í Bolungarvík.
Á fimmtudag verður Gunnar hjá Haukum í Hafnarfirði og er búist við góðri þátttöku.
Gunnar kynnir knattþrautirnar einu sinni á hverjum stað fyrir sig og þjálfurum á viðkomandi stöðum er síðan ætlað að láta iðkendurna spreyta sig oftar yfir sumarið. Þjálfari hvers flokks heldur utan um þátttöku og sendir upplýsingar til KSÍ. Þeir iðkendur sem taka þátt í knattþrautunum a.m.k. þrisvar sinnum í sumar fá sent viðurkenningarskjal frá KSÍ. Þjálfarinn sér um að senda nöfn viðkomandi.
Aðalmarkmiðið með knattþrautum er að fá börn til að vera dugleg að æfa knatttækni sína og fá þjálfara til að leggja áherslu á tækniþjálfun í þjálfuninni hjá sér. Knattþrautirnar eru hannaðar til að hjálpa leikmönnum að bæta tækni, knattrak, skallatækni, sendingar og skottækni svo eitthvað sé nefnt.
.jpg?proc=760)
