Tveggja marka tap í Skopje
Makedónía lagði Ísland í dag í undankeppni fyrir HM 2010 en leikið var í Skopje. Lokatölur urðu 2 - 0 fyrir heimamenn eftir að þeir höfðu haft eins marks forystu í hálfleik.
Heimamenn fengu óskabyrjun þegar þeir komust yfir strax á 10. mínútu leiksins. Nokkuð jafnræði var með liðunum í fyrri hálfleik en Makedóníumenn voru hinsvegar skeinuhættir í skyndisóknum. Þegar franski dómarinn flautaði til leikhlés var staðan því 1 - 0 fyrir heimamenn.
Seinni hálfleikur var heldur tíðindalítill og íslenska liðið náði ekki að ógna marki heimamanna. Seinna mark þeirra kom svo þegar um 5 mínútur voru eftir af venjulegum leiktíma og Makedóníumenn fögnuðu sanngjörnum sigri.
Mikill hiti var á meðan leiknum stóð í Skopje og gerði dómari leiksins tvisvar sinnum hlé á leiknum, í sinnhvornum hálfleiknum, til þess að leikmenn gætu fengið sér vatn að drekka. Leikmenn íslenska liðsins drukku um 70 lítra af vatni á meðan á leiknum stóð.
Íslenska liðið er nú með fjögur stig þegar það á eftir einn leik í riðlinum en þá mæta Norðmenn á Laugardalsvöllinn þann 5. september næstkomandi.
