Níunda knattspyrnuvika Special Olympics
Dagana 25. apríl til 3. maí verður knattspyrnuvika Special Olympics haldin, sem hefur það að markmiði að styðja við og auka knattspyrnuiðkun þroskaheftra, og er þetta í 9. sinn sem þessi knattspyrnuvika er haldin.
Knattspyrnuvikan nýtur öflugs stuðnings UEFA og er jafnan einn af hápunktum hvers árs hjá Special Olympics. Áætlað er að um 50.000 leikmenn í 45 löndum taki þátt í knattspyrnuvikunni, og á meðal þeirra eru leikmenn hér á landi.
Stefnt er að þátttöku þroskaheftra einstaklinga í knattspyrnu í félagi við leikmenn sem ekki eru þroskaheftir (Unified Football). Þannig munu þroskaheftir leikmenn og leikmenn sem ekki eru þroskaheftir leika saman í liði. Markmiðið er að breiða út almennan áhuga þroskaheftra á íþróttinni og að vinna gegn fordómum.
KSÍ tekur þátt í þessu verkefni með ýmsum hætti í samstarfi við Special Olympics á Íslandi. Meðal annars má nefna að þrjár stúlkur frá íþróttafélaginu Ösp, þær Hildur Ása Einarsdóttir, Karen Alda Mikaelsdóttir og Kristín Guðgeirsdóttir, verða lukkukrakkar á vináttulandsleik Íslands og Hollands í A landsliðum kvenna, sem fram fer laugardaginn 25. apríl í Kórnum. Einnig verður settur upp stuttur sýningarleikur í hálfleik í úrslitaleik Lengjubikars karla, sem fram fer í Kórnum föstudaginn 1. maí. Þar verður leikið í blönduðum liðum, þ.e. þroskaheftir saman í liði með leikmönnum sem ekki eru þroskaheftir. Þess má geta að KR og ÍA hófu í vetur að bjóða upp á æfingar þar sem þessir hópar leikmanna leika saman og hefur það verkefni byrjað mjög vel.
Nánar á vefsíðu Special Olympics og Íþróttasambands fatlaðra.
