Frábær byrjun á Algarve
Íslenska kvennalandsliðið byrjaði þátttöku sína í B riðli Algarve Cup 2009 með frábærum hætti þegar sigur vannst á Noregi með þremur mörkum gegn einu. Eftir að staðan hafði verið jöfn í leikhléi, 1 - 1, tók íslenska liðið öll völd á vellinum og bar verðskuldaðan sigur úr býtum. Þetta er í fyrsta skiptið í sex tilraunum sem Ísland vinnur Noreg í A landsleik kvenna en einu sinni höfðu þjóðirnar skilið jafnar, 2 - 2, árið 1984.
Íslenska liðið byrjaði af krafti og Sara Björk Gunnarsdóttir skoraði fyrsta mark leiksins á 16. mínútu eftir aukaspyrnu frá Eddu Garðarsdóttur. Norska liðið komst betur inn í leikinn er leið á hálfleikinn og fengu dæmda vítaspyrnu á 28. mínútu en skutu yfir. Þær jöfnuðu svo leikinn á 39. mínútu. Þannig var staðan þegar japanski dómarinn blés til leikhlés.
Íslensku stelpurnar tóku svo öll völd í byrjun seinni hálfleiks og gerðu út um leikinn á fyrstu átta mínútunum. Sara Björk var aftur á ferðinni á 51. mínútu og skoraði af stuttu færi eftir sendingu frá Hólmfríði Magnúsdóttur. Tveimur mínútum síðar átti Margrét Lára Viðarsdóttir skalla að marki eftir aukaspyrnu Eddu og af leikmanni Noregs endaði boltinn í netmöskvunum.
Bæði lið fengu færi sem eftir lifði leiks en færi íslenska liðsins voru fleiri og betri. Katrín Jónsdóttir átti t.d. skot sem hafnaði í slánni og Hólmfríður vippaði boltanum yfir markvörð Norðmanna en ofan á slánna. Besta færi Norðmanna kom á 60 mínútu þegar þær áttu skot í slá og upp úr frákastinu bjargaði Ásta Árnadóttir á marklínu.
Allir leikmenn liðsins voru tilbúniri í verkefnið og átti það líka við um þá leikmenn sem komu inn sem varamenn. Frábær byrjun á Algarve en ærin verkefni framundan og á föstudaginn eru mótherjarnir Bandaríkmamenn sem lögðu Dani í dag með tveimur mörkum gegn engu.
.jpg?proc=760)
.jpg?proc=760)
