Ísland - Írland í kvöld kl. 18:10
Í kvöld fer fram einn allra mikilvægasti leikur íslenskrar knattspyrnusögu þegar Íslendingar taka á móti Írum á Laugardalsvelli. Leikurinn er seinni leikur þjóðanna í umspili fyrir úrslitakeppni EM 2009 sem fram fer í Finnlandi. Fyrri leiknum lauk með jafntefli, 1-1 og því ljóst að sigurvegarinn í kvöld tryggir sér sæti í úrslitakeppninni á næsta ári. Með markalausu jafntefli kemst íslenska liðið áfram en verði úrslitin 1-1 þarf að framlengja leikinn. Jafntefli með fleiri mörkum þýðir að írska liðið er komið í úrslitakeppnina á fleiri mörkum skoruðum á útivelli.
Leikurinn hefst kl. 18:10 en miðasala hefst á Laugardalsvelli kl. 12:00. Miðasala fer einnig fram á netinu, á www.midi.is. Selt er í ónúmeruð sæti og þvi frjálst sætaval. Fólk er því hvatt til þess að mæta tímanlega til þess að tryggja sér sitt uppáhalds sæti.
Miðaverði er mjög stillt í hóf, miðinn kostar einungis 1.000 krónur fyrir fullorðna en frítt er inn fyrir 16 ára og yngri.
Allir sem vettlingi geta valdið eru hvattir til þess að koma og styðja stelpurnar í þessu lokaskrefi þeirra til Finnlands. Aldrei hefur íslenskt knattspyrnulandslið verið jafn nálægt því að tryggja sér sæti í úrslitakeppni stórmóts. Stelpurnar hafa óskað eftir stuðningi þjóðarinnar og mun hver rödd skipta þar máli.
ÁFRAM ÍSLAND!
.jpg?proc=760)
.jpg?proc=760)
