Frakkland - Ísland í dag kl. 14:00
Loksins er dagurinn runninn upp, íslensku stelpurnar munu mæta Frökkum í dag kl. 14:00 í La Roche-Sur-Yon. Með jafntefli tryggir liðið sig í úrslitakeppni EM 2009 í Finnlandi. Sigri Frakkar fara þeir beint í úrslitakeppnina en umspil bíður þá íslenska liðsins og fer það fram í október.
Íslenska liðið mun mæta í alhvítum búningum til leiks og á Henri Desgrange vellinum verða ríflega 100 íslenskir stuðningsmenn sem munu hvetja liðið áfram.
Ríkissjónvarpið mun verða með beina útsendingu frá leiknum og hefst hún kl. 13:30. Munu þeir fyrir leik senda út frá Vetrargarði Smáralindarinnar og eru allir landsmenn velkomnir þangað til þess að horfa á leikinn á risatjaldi og sameinast í stuðningi við stelpurnar.
Annars staðar hér á síðunni má sjá byrjunarliðið en það tilkynnti Sigurður Ragnar Eyjólfsson, landsliðsþjálfari, á fundi með leikmönnum í gærkvöldi. Á sama fundi sýndi Sigurður Ragnar liðinu myndband sem hann hafði sett saman fyrir leikinn. Á því eru persónulegar kveðjur til leikmanna liðsins fyrir leikinn.
Sjón er sögu ríkari!!
Horfið, hlustið, njótið
ÁFRAM ÍSLAND!!
