U19 kvenna komnar í milliriðil
Stelpurnar í U19 kvenna tryggðu sér í dag sæti í milliriðlum U19 kvenna þegar þær lögðu stöllur sínar frá Grikklandi með tveimur mörkum gegn einu. Grikkir leiddu í hálfleik 1-0.
Það voru íslensku stelpurnar sem að áttu færin í fyrri hálfleik en það voru Grikkir sem komust yfir á 43. mínútu leiksins. Áður hafði íslenska liðið farið illa með ein þrjú dauðafæri.
Eftir aðeins tveggja mínútna leik í síðari hálfleik þá jafnaði Berglind Björg Þorvaldsdóttir metin. Það var svo á 73. mínútu að fyrirliðinn, Fanndís Friðriksdóttir, skoraði sigurmark leiksins eftir glæsilegt einstaklingsframtak.
Þessi sigur þýðir að Ísland er öruggt með sæti í milliriðli en Írar lögðu heimastúlkur í dag, 2-0 og eru því Ísland og Írland örugg áfram. Þessar þjóðir mætast svo á mánudaginn og hefst leikurinn kl. 08:00 að íslenskum tíma.