Naumt tap íslensku stelpnanna í fyrsta leik
Opna Norðurlandamótið hjá U16 kvenna hófst í dag og voru fjórir leikir á dagskránni. Íslensku stelpurnar töpuðu, 0-1, gegn Dönum á Selfossi í hörkuleik en þær mæta Norðmönnum í Þorlákshöfn á morgun, þriðjudaginn 1. júlí.
Riðlakeppnin er leikin á Suðurlandi og Suðurnesjum en í hinum leik A riðils, þar sem Ísland leikur, unnu Þjóðverjar stórsigur á Noregi 7-0 en leikið var á Hvolsvelli. Greinilegt að þýska liðið er gríðarlega sterkt og sýndi það snilldartilþrif í leiknum.
Í B riðli gerðu Svíar og Hollendingar markalaust jafntefli í Garðinum og jafntefli var einnig upp á teningnum í Sandgerði þar sem Frakkland og Finnland skoruðu sitt markið hvor.
Á morgun, þriðjudaginn 1. júlí, fer svo fram önnur umferð riðlakeppninnar en henni lýkur á fimmtudaginn. Leikið verður svo um sæti næstkomandi laugardag. Leikina á morgun má sjá hér að neðan.
Myndirnar hér að ofan eru frá leik Noregs og Þýskalands á Hvolsvelli. Það var Þorsteinn Jónsson er tók þessar myndir.
