Leikið við Frakka 27. september
Laugardaginn 27. september leikur íslenska kvennalandsliðið lokaleik sinn í undankeppni fyrir EM 2009. Leikurinn er einn sá mikilvægasti sem íslenskt landslið hefur leikið en jafntefli tryggir liðinu sæti í úrslitakeppni EM í Finnlandi 2009.
Leikið verður í La Roche Sur Yon í Frakklandi og á leikvelli sem heitir Henri Desgrange. Völlurinn er nefndur eftir upphafsmanni Tour De France hjólreiðakeppninnar og er það vel merkjanlegt á vellinum. Keppnishjólreiðabraut umlykur leikvöllinn en hann tekur 7.000 áhorfendur, þar af 5.000 í sæti.
