Landsliðshóparnir tilkynntir
Á morgun, miðvikudaginn 21. maí kl. 11:30 munu þeir Ólafur Jóhannesson, landsliðsþjálfari karla og Sigurður Ragnar Eyjólfsson, landsliðsþjálfari kvenna, tilkynna landsliðshópa sína er verða í eldlínunni 28. maí næstkomandi.
Landslið karla mun leika vináttulandsleik á Laugardalsvelli við Wales og hefst sá leikur kl. 19:35. Ísland og Wales hafa leikið 5 A landsleiki karla til þessa og hafa Íslendingar farið einu sinni með sigri af hólmi. Það var árið 1984 í undankeppni fyrir HM 1986 og lögðu þá Íslendingar Wales, 1-0, með marki Magnúsar Bergs.
Einu sinni hafa liðin skilið jöfn en það var árið 1981 þegar að Ásgeir Sigurvinsson skoraði tvö glæsileg mörk í 2-2 jafntefli á Vetch Field. Wales hefur aftur á móti sigrað þrisvar sinnum, síðast 1-0 í vináttulandsleik sem leikinn var í Wales árið 1991. Miðasala á leikinn er þegar hafin og fer fram í gegnum miðasölukerfi frá miði.is.
Landslið kvenna mun leika í Serbíu, miðvikudaginn 28. maí í undankeppni fyrir EM 2009. Þar er íslenska liðið í harðri baráttu um að tryggja sér sæti í úrslitakeppninni sem haldin verður í Finnlandi. Eini landsleikur kvenna á milli Íslands og Serbíu til þessa var leikinn á Laugardalsvelli 21. júní á síðasta ári. Þar sáu 5.976 áhorfendur íslenska liðið leggja það serbneska með fimm mörkum gegn engu. Þetta er mesti fjöldi sem séð hefur landsleik kvenna hér á landi.
Íslenska liðið hefur 9 stig eftir fjóra leiki en Frakkar eru á toppnum með 18 stig eftir sjö leiki. Efsta lið riðilsins tryggir sér sæti í úrslitakeppni EM 2009 sem haldin verður í Finnlandi. Annað sæti í riðlunum tryggir sæti í umspili ásamt þeim fjórum þjóðum er bestan árangur hafa í þriðja sæti í riðlunum sex. Tólf þjóðir munu leika í úrslitakeppninni í Finnlandi að þessu sinni.
Landsleikur Íslands og Serbíu verður í beinni útsendingu hjá RUV og hefst leikurinn kl. 15:00. Landsleikur Íslands og Wales verður í beinni útsendingu einnig á RUV og hefst leikurinn kl. 19:35.
.jpg?proc=760)
.jpg?proc=760)
