Írar lagðir í Dublin
Íslenska U19 kvennalandsliðið lagði Íra í dag með einu marki gegn engu. Leikurinn, sem fór fram í Dublin, er fyrri vináttulandsleikur liðanna en síðari leikurinn fer fram á sunnudaginn. Hlín Gunnlaugsdóttir skoraði mark Íslands úr vítaspyrnu í fyrri hálfleik.
Leikurinn var frekar jafn og lítið um opin marktækifæri hjá liðunum. Munurinn lá í því að Ísland fékk vítaspyrnu einni mínútu fyrir lok fyrri hálfleiks. Fyrirliðinn, Hlín Gunnlaugsdóttir, fór á punktinn og skoraði sigurmark leiksins.
