Slóvakía - Ísland í kvöld kl. 19:15
Ísland mætir Slóvakíu í vináttulandsleik ytra í kvöld kl. 19:15 og verður leikurinn í beinni útsendingu á sjónvarpsstöðinni Stöð 2 Sport.
Þessar þjóðir hafa mæst tvisvar sinnum áður í A-landsleik karla og hafa báðir leikirnir verið vináttulandsleikir. Slóvakar hafa farið með sigur af hólmi í báðum þessum leikjum, 3-1 árið 1997 og 2-1 árið 1998.
Ólafur Jóhannesson, landsliðsþjálfari, mun tilkynna byrjunarliðið síðar í dag og verður það birt hér á síðunni.
Vel hefur farið um liðið í Bratislava og hafa æfingar gengið vel og vel verið tekið á. Markverðirnir Stefán Logi Magnússon og Kjartan Sturluson, ásamt markmannsþjálfaranum Bjarna Sigurðssyni, tóku sér stutt hlé á æfingunni í gær. Búningastjórinn sívökuli, Björn Ragnar Gunnarsson, var þá ekki lengi að smella af mynd af þeim félögum er sést hér að ofan.
