Kvennalandsliðið upp um tvö sæti
Íslenska kvennalandsliðið færist upp um tvö sæti á styrkleikalista FIFA er birtur var í dag. Ísland er nú í nítjánda sæti listans eftir góðan árangur á Algarve Cup fyrr í þessum mánuði.
Sigurvegarar mótsins á Algarve, Bandaríkin, eru á toppi listans og hafa þar sætaskipti við heimsmeistara Þýskalands.
Íslenska liðið hefur setið í 21. sæti styrkleikalistans síðan í september 2006 og er engin þjóð, af þeim 35 efstu, sem tekur hærra stökk á listanum að þessu sinni.
Næstu verkefni landsliðsins eru vináttulandsleikir gegn Finnum, 4. og 7. maí næstkomandi. Þremur vikum eftir síðari leikinn verður svo leikið gegn Serbum ytra í undankeppni EM 2009. Heimaleikir gegn Slóvenum og Grikkjum fylgja svo í kjölfarið í júní áður en Frakkar verða heimsóttir í lok september.
.jpg?proc=760)
.jpg?proc=760)
