U17 kvenna leikur í milliriðli EM í Danmörku
Kristrún Lilja Daðadóttir, landsliðsþjálfari U17 kvenna, hefur tilkynnt hóp sinn er heldur til Danmörku um páskana. Þar leikur liðið í milliriðli fyrir EM 2008 en mótherjarnir verða, auk heimamanna, Rússar og Finnar.
Íslenska liðið tryggði sér þátttökurétt í milliriðlum með því að sigra örugglega riðil sinn í undankeppninni en þar voru mótherjarnir Lettland, Slóvenía og Úkraína.
Sigurvegari milliriðilsins tryggir sér sæti í úrslitakeppni EM 2008 en hún fer fram í Nyon í Sviss. Er þetta í fyrsta skiptið er úrslitakeppni er haldin í þessum aldursflokki og verða það fjórar þjóðir er leika í þessari fyrstu keppni.
