Milliriðlarnir klárir hjá U17 og U19 kvenna
Í dag var dregið í milliriðla fyrir EM 2008 hjá U17 og U19 kvenna. Ísland var í pottinum í báðum þessum keppnum og er ljóst að erfiðir leikir eru framundan hjá stelpunum þegar leikið verður í vor.
U17 kvenna er í riðli með Finnlandi, Danmörku og Rússlandi en sigurvegari riðilsins tryggir sér sæti í úrslitakeppninni er leikin er í maí. Riðillinn verður leikinn í Danmörku dagana 24. - 29. mars.
Hjá U19 kvenna lentu stelpurnar í riðli með Englandi, Belgíu og Póllandi. Leikið verður dagana 24. - 29. apríl og fer riðillinn fram í Belgíu. Þarna eigast við þrjár af þeim þjóðum er léku í úrslitakeppni EM U19 kvenna sem fram fór hér á landi í sumar. Íslenska og pólska liðið eru reynslunni ríkari eftir þátttökuna þá. Enska liðið komst hinsvegar alla leið í úrslitaleikinn gegn Þjóðverjum undir styrkri stjórn hinnar einu sönnu Mo Marley.
Sigurvegarar riðlanna sex tryggja sér sæti í úrslitakeppninni í Frakklandi ásamt þeirri þjóð er nær bestum árangri í öðru sæti riðlanna.
