Glæsilegri úrslitakeppni U19 kvenna lokið
Eins og kunnugt er lauk úrslitakeppni EM U19 landsliða kvenna með úrslitaleik á Laugardalsvelli síðastliðinn sunnudag. Mótið var hið glæsilegasta í alla staði og eiga hinir fjölmörgu sjálfboðaliðar sem störfuðu við mótið þakkir skildar.
Mótið hófst með fyrstu leikjum í riðlakeppninni þann 18. júlí og var formlegur vígsluleikur mótsins viðureign Íslands og Noregs á Laugardalsvelli. Úrslitaleikurinn fór síðan fram á sama velli sunnudaginn 29. júlí og þar mættust Þjóðverjar og Englendingar.
Tveir leikir fóru fram á Kópavogsvelli, Grindavíkurvelli, Akranesvelli, Fylkisvelli, Víkingsvelli og KR-velli, en þrír leikir á Laugardalsvelli.
Skipulagning og framkvæmd móts sem þessa krefst gríðarlegrar vinnu. Við mótið starfaði ekki aðeins starfsfólk KSÍ, undir leiðsögn mótsstjórans Klöru Bjartmarz, auk stjórnar- og nefndarmanna KSÍ, heldur einnig fjölmennt starfslið frá UEFA og fjölmargir sjálfboðaliðar úr knattspyrnuhreyfingunni hér á landi.
Framkvæmd leikja á völlunum tókst með miklum ágætum og hrósuðu fulltrúar UEFA og þjóðanna sem hér kepptu Íslandi í hástert vegna gæða leikvanganna, keppnisvallanna sjálfra og öflugs starfsfólks og sjálfboðaliða á völlunum.
Þessi glæsilega úrslitakeppni er til marks um þann kraft og þá samheldni sem er í knattspyrnuhreyfingunni hér á landi - þökk sé grasrótinni og sjálfboðaliðunum í aðildarfélögum KSÍ.
.jpg?proc=760)
.jpg?proc=760)
