Þjóðverjar Evrópumeistarar U19 kvenna
Þjóðverjar lögðu Englendinga með tveimur mörkum gegn einu í úrslitaleik EM U19 kvenna á Laugardalsvellinum í dag. Markalaust var eftir venjulegan leiktíma og bæði mörkin komu í framlengingu.
Þjóðverjar, sem voru handhafar Evrópumeistaratitilsins fyrir leikinn í dag, voru taldir sigrustranglegari aðilinn, en Englendingar hafa bætt sig mikið á síðustu misserum og taldir til alls líklegir.
Jafnræði var með liðunum allan fyrri hálfleikinn. Varnir beggja liða voru þéttar fyrir og gáfu ekki mörg færi á sér, en Þjóðverjar komust næst því að skora þegar fyrirliðinn Nadine Kessler átti þrumuskot í þverslá enska marksins.
Þýska liðið var sterkara í síðari hálfleik, en enska vörnin var gríðarlega þétt fyrir og var það fyrirliði þeirra, Fern Whelan, fremst í flokki. Ekkert mark var skorað í venjulegum leiktíma, þrátt fyrir harða hríð Þjóðverja að marki Englendinga, og því þurfti að framlengja.
Strax á annarri mínútu framlengingarinnar náðu Þjóðverjar forystu með marki frá Nathalie Bock, sem kom knettinum í netið eftir mikinn barning í enska vítateignum.
Englendingar lögðu þá meira í sóknina og freistuðu þess að jafna, en allt kom fyrir ekki, og það voru Þjóðverjar sem bættu við marki á lokamínútu framlengingarinnar. Þar var að verki Monique Kerschowski, sem gulltryggði þar með þýskan sigur. Þjóðverjar eru því Evrópumeistarar U19 landsliða kvenna annað árið í röð og í fimmta sinn á átta árum.
.jpg?proc=760)
.jpg?proc=760)
