Undanúrslitin á fimmtudag hjá U19 kvenna
Nú standa fjórar þjóðir eftir í úrslitakeppni EM U19 kvenna og er leikið í undanúrslitum á morgun, fimmtudag. Á Laugardalsvelli leika Þýskaland og Frakkland kl. 16:00 og kl. 19:00 mætast England og Noregur á KR-velli.
Þýskaland og Frakkland léku til úrslita í síðustu keppni U19 kvenna og höfðu þá Þjóðverjar betur og eru því handhafar titilsins. Ljóst er að Frakkar ætla sér að stærri hluti í þessari keppni og má búast við hörkuleik í Laugardalnum kl. 16:00 á fimmtudaginn.
Á KR-velli kl. 19:00 eigast við England og Noregur. Englendingar sigruðu í B-riðli en norsku stelpurnar tryggðu sér sæti í undanúrslitunum með því að leggja Dani í lokaleik riðilsins. Er það ekki í fyrsta skiptið því mark á lokamínútunni gegn Dönum í lokaleik milliriðils keppninnar tryggði Norðmönnum sæti í þessari úrslitakeppni á Íslandi.
Þessar þjóðir sem leika í undanúrslitum, eru ekki aðeins ennþá í baráttunni um Evrópumeistaratitilinn, heldur hafa þær einng tryggt sér þátttökurétt á HM U20 kvenna er fram fer í Chile.
.jpg?proc=760)
