Leikir dagsins í úrslitakeppni U19 kvenna
Úrslitakeppni EM U19 kvenna hefst í dag og eru fjórir leikir á dagskrá. Á Fylkisvelli mætast Pólland og England, á Kópavogsvelli leika Spánn og Frakkland og á Víkingsvelli mætast Danmörk og Þýskaland. Allir þessir leikir hefjast kl. 16:00. Á Laugardalsvelli kl. 19:15 leika svo Íslendingar og Norðmenn.
Danmörk - Þýskaland
Víkingsvöllur kl. 16:00
Þessar þjóðir leika í A-riðli ásamt Íslendingum og Norðmönnum. Þjóðverjar eru núverandi handhafar Evrópumeistaratitilsins og eru til alls líklegar. Það verður því erfið byrjun hjá Dönum en búast má við sterku liði frá Danmörku á þessu móti.
Dómari: Dilan Gökcek Tyrklandi
Aðstoðardómarar: Oxana Akulova Rússlandi og Lada Rojc Króatíu
Fjórði dómari: Kirsi Savolainen Finnlandi
Dómaraeftirlitsmaður UEFA: Josef Marko Slóvakíu
Ísland - Noregur
Laugardalsvöllur kl. 19:15
Ljóst að íslenska liðið þarf góðan stuðning í þessum leik og er þá til alls líklegt enda mætir það vel undirbúið til leiks. Íslenska liðið hefur vaxið jafnt og þétt í undirbúningnum og náði m.a. góðum úrslitum á æfingamóti á La Manga, fyrr á þessu ári. Norðmenn tryggðu sér farseðilinn til Íslands á síðustu stundu þegar þær jöfnuðu gegn Danmörku í blálokin í síðasta leik milliriðils síns. Endaði Noregur því með bestan árangur allra liða í öðru sæti og komst áfram. Noregur ætlar sér engu að síður stóra hluti í keppninni enda mikil hefð hjá Norðmönnum í kvennaknattspyrnunni.
Dómari: Esther Staubli Sviss
Aðstoðardómarar: Agnes Sirrka Oswald Austurríki og Ttvia Malca Ísrael
Fjórði dómari: Ekaterina Marinova Búlgaríu
Dómaraeftirlitsmaður UEFA: Ingrid Jonsson Svíþjóð
Pólland - England
Fylkisvöllur kl. 16:00
Pólverjar komu mjög á óvart með því að tryggja sér sæti í úrslitakeppninni á kostnað Rússa. Pólska liðið er því óskrifað blað í keppninni en geta reynst ensku stelpunum erfiður ljár í þúfu. Margir spá Englendingum góðu gengi í keppninni en góð byrjun þeirra í mótinu getur haft þar mikið að segja.
Dómari: Daniela Markovic Serbíu
Aðstoðardómarar: Vivian Peters Hollandi og Zuzana Kovacova Slóvakíu
Fjórði dómari: Katalin Kulczar Ungverjalandi
Dómaraeftirlitsmaður UEFA: Sigurður Hannesson Íslandi
Spánn - Frakkland
Kópavogsvöllur kl. 16:00
Ljóst er að þarna mætast stálin stinn og er báðum þessum þjóðum spá mikilli velgegni í mótinu. Frakkar eru taldir sigurstranglegastir í riðlinum fyrirfram en í síðustu tveimur úrslitakeppnum U19, hafa Frakkar tapað í úrslitaleik. Spánverjar þykja engu síðri og það voru Spánverjar er báru sigur úr býtum í þessari keppni árið 2004. Hér verður ekkert gefið eftir!!
Dómari: Efthalia Mitsi Grikklandi
Aðstoðardómarar: Helen Caro Svíþjóð og Knarik Grigoryan Armeníu
Fjórði dómari: Pavla Turkova Tékklandi
Dómaraeftirlitsmaður UEFA: Ingi Jónsson Íslandi
Áhorfendur eru hvattir til þess að mæta á leikina og sjá efnilegustu knattspyrnukonur álfunnar í hörkukeppni. Orkuveita Reykjavíkur býður öllum áhorfendum frítt inn á leiki keppninnar.
Úrslitakeppni U19 kvenna á uefa.com
.jpg?proc=760)
