U19 kvenna leikur gegn Englandi í dag
Íslenska U19 kvennalandsliðið leikur í dag gegn stöllum sínum frá Englandi á æfingamóti landsliða sem haldið er á La Manga. Mótið er liður í undirbúningi liðsins fyrir úrslitakeppni EM sem haldin er hér á landi í júlí. Ólafur Þór Guðbjörnsson, landsliðsþjálfari, hefur tilkynnt byrjunarlið sitt en leikurinn hefst kl. 13:00 að íslenskum tíma.
Byrjunarliðið: (4-5-1)
Markvörður: Ása Aðalsteinsdóttir
Hægri bakvörður: Anna Þórunn Guðmundsdóttir
Vinstri bakvörður: Kristrún Kristjánsdóttir
Miðverðir: Agnes Þóra Árnadóttir og Guðrún Erla Hilmarsdóttir
Tengiliðir: Linda Rós Þorláksdóttir og Hlín Gunnlaugsdóttir
Sóknartengiliður: Sara Björk Gunnarsdóttir
Hægri kantur: Sandra Sif Magnúsdóttir
Vinstri kantur: Laufey Björnsdóttir
Framherji: Rakel Hönnudóttir
Íslenska liðið tapaði gegn Ítölum í fyrsta leik liðsins á mótinu með einu marki gegn tveimur. Englendingar gerðu jafntefli við Norðmenn í sínum fyrsta leik, 1-1.
England - Ísland
Íslenska liðið bjóst við erfiðum leik enda enska liðið mjög sterkt. Þessar þjóðir léku 2 vináttulandsleiki á Íslandi í nóvember síðastliðnum. Englendingar báru sigur úr býtum í báðum leikjum, 3-0 og 4-0.
Enska liðið sótti töluvert meira í fyrri hálfleik en íslenska liðið barðist af grimmd og spilaði varnarleikinn virkilega vel. Þegar dómari leiksins flautaði til hálfleiks hafði ekkert mark verið skorað, 0-0.
Mark, 0-1 fyrir Ísland
Íslenskar knattspyrnukonur fara hamförum í dag. Laufey Björnsdóttir skoraði fyrir Ísland með þrumfleyg frá vítateigslínu, stórglæsilegt mark. Markið kom á 51. mínútu.
Englendingar jafna leikinn á 60. mínútu með skallamarki, staðan 1-1.
Íslendingar hafa gert tvær breytingar á liði sínu. Rúna Sif Stefánsdóttir og Anna Garðarsdóttir hafa komið inn á í stað Söndru Sifjar Magnúsdóttur og Söru Bjarkar Gunnarsdóttur.
Leiknum lokið með jafntefli, 1-1. Frábær úrslit hjá stelpunum sem eru greinilega í mikilli sókn.
