Ísland mætir Kína á Algarve Cup
Íslenska kvennalandsliðið mun mæta því kínverska í leik um níunda sætið á Algarve Cup 2007. Þetta var ljóst eftir leiki gærkvöldsins en Ísland vann þar öruggan 5-1 sigur á Portúgal en Kína tapaði 0-2 fyrir Finnum.
Kína hefur verið eitt af stóru nöfnunum í kvennaboltanum í gegnum árin og fer Heimsmeistarakeppnin einmitt fram þar í september á þessu ári. Kína vann silfurverðlaunin á HM í Bandaríkjunum árið 1999 eftir að tapa í frægri vítaspyrnukeppni í úrslitaleik fyrir heimastúlkum. Kínverska liðið er sem stendur í níunda sæti styrkleikalista FIFA en nýr listi verður birtur föstudaginn 16. mars.
Kvennalið þessara þjóða hafa aldrei mæst áður og aðeins einu sinni hafa landslið þessara þjóða att kappi á knattspyrnuvellinum. Það var árið 1994 þegar að U19 karlalandslið Íslands og Kína mættust á Ítalíumótinu.
Leikur Íslands og Kína hefst kl. 10:00 fyrir hádegi á morgun, miðvikudag og verður fylgst með gangi mála hér á síðunni.
Til úrslita á Algarve Cup leika Danmörk og Bandaríkin. Um þriðja sætið leika Svíar og Frakkar en Frakkland er í riðli með Íslendingum í undankeppni EM 2009. Finnar og Þjóðverjar etja kappi um fimmta sætið og Ítalía og Noregur um það sjöunda. Loks leika Írland og Portúgal um sæti númer ellefu.
.jpg?proc=760)
.jpg?proc=760)
