Tillögur á ársþingi KSÍ 2007
Kosningar og athygliverðar tillögur munu vera áberandi á 61. ársþingi KSÍ sem verður haldið á Hótel Loftleiðum 10. febrúar nk. Sambandsaðilar eru beðnir um að kynna sér eftirfarandi upplýsingar og gögn:
1. Tillögur
Hjálagt fylgja allar tillögur sem KSÍ hefur borist og teknar verða til afgreiðslu á ársþinginu. Tillögurnar eru sendar bæði til héraðssambanda og íþróttabandalaga sem og til allra félaga sem hafa verið þátttakendur í knattspyrnumótum á vegum KSÍ sl. ár. Þess er vænst að tillögunum sé komið sem fyrst til væntanlegra þingfulltrúa, þannig að þeir hafi tök á að kynna sér þær vel áður en á ársþing er komið.
Tillögur:
Athygli er vakin á því að tillögur um fjölgun koma fram í tillögu 7 - Lög KSÍ.
2. Kjörbréf
Hjálagt er kjörbréf til héraðssambanda og íþróttabandalaga og er þess óskað að þau verði fyllt út með nöfnum fulltrúa og varafulltrúa og afrit faxað til KSÍ í síðasta lagi 2. febrúar nk. Óskað er eftir að allir aðilar tryggi að svo verði gert. Upplýsingar um fjölda fulltrúa fylgir og hjálagt.
3. Dagskrá
Þingið verður sett kl. 10:00 laugardaginn 10. febrúar og gert er ráð fyrir að því ljúki um kl. 16:00 sama dag. Öllum þingfulltrúum er hér með boðið til sameiginlegs kvöldverðar og skemmtunar í Lídó í Húsi iðnaðarins við Hallveigarstíg sem hefst kl. 19:30. Á undan verður boðið upp á fordrykk frá kl. 18:00 í nýjum höfuðstöðvum KSÍ á Laugardalsvelli. (Þingfulltrúum er boðið til kvöldverðar en félög geta keypt miða fyrir fleiri gesti – hafið samband við Ragnheiði 510-2905).
Dagskrá þingsins laugardaginn 10. febrúar:
Kl. 09:00 Afhending þinggagna.
Kl. 10:00
1. Þingsetning.
2. Kosning þriggja manna kjörbréfanefndar.
3. Kosning fyrsta og annars þingforseta.
4. Kosning fyrsta og annars þingritara.
5. Ávörp gesta.
6. Álit kjörbréfanefndar.
7. Lögð fram skýrsla fráfarandi stjórnar.
8. Lagðir fram endurskoðaðir reikningar KSÍ til samþykktar.
9. Umræður um skýrslu stjórnar og reikninga.
10. Stjórn KSÍ leggur fram tillögu að fjárhagsáætlun fyrir næsta starfsár.
11. Tillögur um breytingar á lögum og reglugerðum teknar til afgreiðslu.
12. Tillögur um önnur mál sem borist hafa til stjórnar teknar til afgreiðslu.
13. Önnur mál
14. Kosningar. Álit kjörnefndar.
a. Kosning stjórnar.
1. Kosning formanns (annað hvert ár).
2. Kosning 4ra manna í aðalstjórn.
3. Kosning 4ra manna frá landsfjórðungum í stjórn.
4. Kosning 3ja varamanna í aðalstjórn.
5. Kosning 4ra varamanna úr landsfjórðungum í stjórn.
b. Kosning fulltrúa á íþróttaþing ÍSÍ.
c. Kosning skoðunarmanna reikninga (tveir aðalmenn og tveir varamenn).
d. Kosning í áfrýjunardómstól KSÍ (3 aðalmenn og 5 varamenn).
e. Kosning í dómstóll KSÍ (5 menn).
f. Kjörnefnd, 3ja manna, er starfi milli þinga.
15. Fundargerð þingsins borin upp til samþykktar.
16. Þingslit. (16:00)
Hlé verður gert á störfum þingsins kl. 12 en þá býður KSÍ til hádegisverðar.
Kl. 18:00 Fordrykkur í nýjum höfuðstöðvum KSÍ á Laugardalsvelli
Kl. 19:30 Kvöldverður og skemmtun í Lídó í Húsi iðnaðarins við Hallveigarstíg
4. Skuldir
Hjálagt er yfirlit yfir fjárhagslega stöðu aðildarfélagsins gagnvart KSÍ miðað við 31. des. sl. sem og fréttatilkynning KSÍ vegna greiðslna til aðildarfélaga (sem hefur verið fært þeim til tekna). Þau félög sem skulda eru beðin um að greiða skuldina eða semja um greiðslu hennar fyrir 8. febrúar nk. því eins og fram kemur í lögum KSÍ, geta þau félög sem skulda KSÍ ekki átt fulltrúa á ársþingi.
5. Gisting
Hótel Loftleiðir býður þingfulltrúum og þinggestum gistingu sem hér greinir:
Eins manns herbergi með morgunverð kr. 6.000.- pr. nótt
Tveggja manna herbergi með morgunverð kr. 7.400.- pr. nótt
Sambandsaðilar skulu sjálfir panta herbergi í síma 444-4500 og þegar það er gert skal vísað til þess að það sé gert í tengslum við þingið.
