Ísland leikur við Svía um þriðja sætið
Ísland mun leika við Svía um þriðja sætið á Norðurlandamóti U21 kvenna sem fram fer í Stavanger í Noregi. Þetta varð ljóst eftir úrslit í leik Bandaríkjanna og Noregs en fyrr í dag burstuðu íslensku stelpurnar stöllur sínar frá Danmörku, 6-1. Í lokaleik riðilsins sigruðu Bandaríkjamenn Norðmenn, 4-0. Var ljóst fyrir leikinn að bandarísku stelpurnar þurftu að vinna með fjögurra marka mun til þess að komast upp fyrir Íslendinga.
Leikurinn um bronsið fer fram á laugardaginn kl. 11:30 að íslenskum tíma og verða mótherjarnir Svíþjóð. Þýskaland og Bandaríkin leika til úrslita á mótinu
Þessi árangur hjá Elísabetu Gunnarsdóttur þjálfara og hennar stelpum er frábær því mótið er geysisterkt. Ef skoðaður er síðasti styrkleikalisti FIFA hjá A-landsliðum kvenna, þá taka þrjár efstu þjóðirnar þátt í þessu móti. Þýskaland, Bandaríkin og Noregur. Svíar eru svo í fimmta sæti styrkleikalistans, Danir í því níunda, Englendingar í tólfta og Finnar í sextánda sæti. Þó svo að listinn segi ekki til um styrkleika U21 landsliða þjóðanna, má sjá að þátttökuþjóðirnar á þessu móti eru þær allra fremstu í kvennaknattspyrnu á heimsvísu.
Við bíðum spennt eftir að fylgjast með stelpunum á laugardaginn en hópurinn kemur svo heim á sunnudag.
Mynd: Íslenski hópurinn eftir leikinn gegn Dönum.
.jpg?proc=760)
.jpg?proc=760)
