Danir teknir í kennslustund
Íslenska U21 kvennalandsliðið rótburstaði Dani í lokaleik sínum í riðlakeppni Norðurlandamótsins. Lokatölur urðu 6-1, eftir að Danir höfðu komist yfir á 11. mínútu.
Nú er beðið með eftirvæntingu eftir úrslitum úr leik Bandaríkjanna og Noregs en hann hefst kl. 17:00 að íslenskum tíma. Tapi Bandaríkin stigi eða vinna með minna en fjögurra marka mun, spila Íslendingar til úrslita í mótinu. Ef að Bandaríkjastúlkur sigra með fjórum mörkum eða meira, leika Íslendingar um bronsið. Leikið er um sæti á mótinu á laugardaginn.
Danir komust yfir á 11. mínútu en þá hrökk íslenska liðið í gang svo um munaði. Hólmfríður Magnúsdóttir jafnaði metin á 16. mínútu og Margrét Lára kom Íslendingum yfir á 19. mínútu. Þannig var staðan í hálfleik en á 53. mínútu bætti Margrét Lára í sarpinn með öðru marki sínu.
Helga Sjöfn Jóhannesdóttir kom Íslandi í 4-1 á 72. mínútu áður en Margrét Lára fullkomnaði þrennu sína á 88. mínútu. Það var svo Sif Atladóttir sem að kórónaði frábæran leik Íslendinga með því að skora sjötta markið á lokamínútunni.
Við munum fylgjast með leik Bandaríkjanna og Noregs og birta úrslit hans, hér á síðunni, strax að loknum leik.
.jpg?proc=760)
.jpg?proc=760)
