Albanskur sigur í Tirana
Albanía lagði Ísland með tveimur mörkum gegn einu í vináttulandsleik í Tirana í kvöld, miðvikudagskvöld. Heimamenn náðu forystunni undir lok fyrri hálfleiks, en fyrirliðinn Þórður Guðjónsson, sem var að leika sinn 50. landsleik, jafnaði metin á 66. mínútu eftir góðan undirbúning Veigars Páls Gunnarssonar. Sigurmark Albana kom síðan gegn gangi leiksins á 78. mínútu. Albanir voru sterkari í fyrri hálfleik, en íslenska liðið átti nokkra ágæta kafla í leiknum, sérstaklega í síðari hálfleik.
