Glæsilegur sigur í Kaunas
A landslið karla vann glæsilegan 3-0 sigur á Litháen í undankeppni EM í kvöld, miðvikudagskvöld, en leikurinn fór fram í Kaunas í Litháen. Frammistaða okkar manna var mjög góð og sigurinn fyllilega verðskuldaður, sem hlýtur að gefa liðinu byr undir báða vængi fyrir viðureignina við Færeyinga í ágúst. Markalaust var í hálfleik, en Þórður Guðjónsson, Eiður Smári Guðjohnsen og Hermann Hreiðarsson tryggðu Íslandi frábæran sigur og voru öll mörkin glæsileg. Auk þess að skora eitt mark lagði Eiður Smári upp hin mörkin tvö. Frábær frammistaða og er Ísland nú í öðru sæti í sínum riðli á eftir Þjóðverjum.
