Sigur hjá U19 karla
U19 landslið karla sigraði jafnaldra sína frá Skotlandi 2-1 í kvöld, en leikið var á heimavelli Stirling Albion í Stirling. Eftir tíðindalítinn fyrri hálfleik náðu heimamenn forystunni á 71. mínútu með góðu skoti frá vítateig. Kjartan Finnbogason jafnaði metin á 75. mínútu, en fékk síðan að líta sitt annað gula spjald 5 mínútum síðar og þar með það rauða. Manni færri börðust okkar piltar vel og fengu dæmda vítaspyrnu á lokamínútunni eftir að Ólafi Johnson var brugðið innan teigs. Ívar Björnsson skoraði örugglega úr vítaspyrnunni og tryggði íslenskan sigur. Liðin mætast að nýju á fimmtudag kl. 18:00 að íslenskum tíma, en þá verður leikið á Recreation Park í Alloa.
