Ósigur hjá U21 gegn Litháen
U21 landslið karla beið í dag lægri hlut gegn Litháen í undankeppni EM, en leikið var á Akranesvelli. Gestirnir náðu forystunni um miðbik fyrri hálfleiks, en Hannes Þ. Sigurðsson jafnaði metin á 43. mínútu úr vítaspyrnu. Íslenska liðið sótti linnulítið í síðari hálfleik, líkt og á móti Skotum síðastliðinn föstudag, en þrátt fyrir nokkur ákjósanleg færi tókst liðinu ekki að skora. Það tókst Litháum hins vegar eftir vel útfærða skyndisókn og urðu lyktir leiksins því 1-2 ósigur íslenska liðsins.
