Sömu úrslit hjá A liðinu og U21
Ísland tapaði fyrir Skotum í undankeppni EM á Laugardalsvelli í dag með sömu markatölu og U21 landslið karla tapaði á föstudag, 0-2. Gestirnir náðu forystunni strax á 7. mínútu með skallamarki frá leikmanni West Ham, Christian Dailly. Jafnræði var með liðunum mest allan leikinn, en þó virkuðu sóknaraðgerðir Skotanna beittari. Síðara markið kom á 63. mínútu og var þar að verki Gary Naysmith, leikmaður Everton. Ekki nógu góð byrjun í undankeppninni hjá íslenska liðinu og ljóst að nú þurfa strákarnir að spýta í lófana fyrir leikinn gegn Litháum á miðvikudag.
