Kristinn stendur sig vel á HM U17
Kristinn Jakobsson dæmdi á sunnudagskvöld leik Nígeríu og Ástralíu í 8-liða úrslitum í úrslitakeppni HM U17 liða karla, sem fram fer þessa dagana á Trinidad & Tobago. Nígería sigraði 5-1 í frábærum leik, en í hálfleik var staðan 1-0 þeim í vil.
Kristinn hefur nú starfað við 4 leiki í keppninni. Fyrst var hann varadómari í leik Mali og Paraguay, síðan dæmdi hann leik Spánar og Burkina Faso (0-1) og að lokum leik Paraguay og Íran (3-2). Kristinn stóð sig með miklum ágætum í öllum þessum leikjum og hefur hann hlotið mjög háa einkunn í skýrslum eftirlitsmanna fyrir frammistöðu sína.